He Tauira Horopaki Whakaako
He tauira horopaki noa iho ēnei e whai ake nei mō te whakaako i ngā kaupapa pāngarau o roto i te marautanga. Mā te kaiako tonu e tīpako ngā horopaki e hāngai ana ki āna ākonga, hei āwhina i a rātou ki te ako i ngā kaupapa pāngarau. Hei whakaaro ake:
- Me tūhono ngā akoranga pāngarau ki ngā momo horopaki o te wāhi e noho nei te kura – pēnā he kura ki tai, ki tuawhenua, ki tāone nui rānei
- Me tūhono ngā akoranga pāngarau ki ērā atu wāhanga ako o te kura – pēnā ko tētahi kaupapa pūtaiao (pērā i te awa), pēnā ko tētahi kaupapa tikanga ā-iwi (pērā i te pōti kāwanatanga), pēnā ko tētahi kaupapa hauora (pērā i te kai tika me te whakapakari tinana).
- Me tūhono ngā akoranga pāngarau ki ngā momo horopaki e taunga ana te ākonga, pērā i te hākinakina, te mahi rorohiko me te mahi toi.
- Me kuhu atu ngā horopaki Māori i roto i ngā akoranga pāngarau pērā i te hanga o te wharenui, te kapa haka, te tito pātere me te manaaki manuhiri.
Te Ine me te Āhuahanga
Taumata 1 |
Te Māra a Tāne |
Tirohia ētahi mea e toru o roto i te ngahere, ka whakatairite ai, ka raupapa ai mai i te iti ki te rahi (te poto ki te roa, te whāiti ki te whānui rānei). Hei tauira:
- tētahi rau tōtara, tētahi rau rangiora, tētahi rau tawa
- te paenga o te tawa, te hinau, me te nīkau
- te teitei o te mataī, te putaputawētā me te karamu
- te roa o te noke, te huhu me te anuhe
|
Taumata 2 |
Mōku Anō |
- Āta whakaarohia ngā āhuatanga katoa e pā ana ki tētahi tangata e taea ana te ine, me te waeine e hāngai ana. Hei tauira: te tāroaroa, te taumaha, te roa o ngā makawe, te tere ki te omaoma i te 100 mita ...
- Inea ētahi āhuatanga e whā, ka tuhi ai ki tētahi tūtohi. Whakatairitea ngā inenga o tēnā o tēnā o ngā ākonga.
- Whakamahia te aho me te taura ine hei ine i ētahi wāhanga o te tinana, pērā i te tāroaroa, te mārō, te tuke, te matikara, te kawititanga o te ringaringa, te whatīanga raparapa, te tapuwae ...
- Raupapahia ēnei inenga mai i te poto ki te roa.
- Āta tirohia mēnā he ōrite te raupapatanga mō ia ākonga, he rerekē rānei, ka wānanga ai.
Tirohia:
Pēhea nei te tāroaroa? |
Taumata 3 |
Te Hanga o te Wharenui |
- Tautohua ngā āhua e kitea mai ana i te hanga o tētahi wharenui me ngā mahi toi o roto.
- Āta wānangahia te takenga mai o ngā ingoa mō ēnei āhua: tapawhā hāngai, tapawhā rite, tapatoru waerite, tapatoru rite, tapatoru hāngai, tapawhā whakarara, tapawhā whakarara rite, rīpeka ...
- Tirohia te hangarite o ngā āhua.
- Tirohia te whakamahinga o ngā āhua hei hanga rōpinepine.
Tirohia:
He Āhua Ahu-2. Nā Te Pou Taki Kōrero i whakaputa i te tau 2005. |
Taumata 4 |
Te Takiwā o te Kura |
- Tonoa ngā ākonga kia tuhi noa i tētahi mahere o te takiwā o te kura, ka whakaatu ai i ngā wāhi motuhake pērā i ngā kōawa, ngā hiwi, ngā marae, ngā roto, me ngā ngahere.
- Whakatairitea ngā mahere a ngā ākonga ki tētahi mahere tika. Wānangahia ngā ahunga atu i te kura ki tēnā wāhi ki tēnā.
- Tuhia he kōrero, he pātere hei whakaahua i ngā wāhi matua o te takiwā. Hei tauira tīmatanga: Ka noho au ki te mahau o taku akomanga ka titiro whakateraki ki te maunga o Hiwinui ...
- Tūhuratia ngā inenga koki o te kāpehu hei whakaatu ahunga ki te mahere.
- Tūhuratia te whakamahinga o te pūnaha tukutuku hei whakaatu wāhi ki te mahere.
Tirohia:
Te Ahunga me te Taunga |
Taumata 5 |
Te Hanga Māra |
- Tūhuratia te pānga o te whānui, te roa me te horahanga o tētahi māra kai he tapawhā hāngai te āhua. Whakaaturia ngā pānga ki te kauwhata.
- Hoahoatia he māra putiputi mō tētahi wāhi i te kura, i te marae rānei. Tuhia hei hoahoa āwhata.
- Whiriwhiria te rahi o te oneone hei whakakī i te māra.
|