Te Ine I Te Roa

Hei Whakarāpopoto

Ko te kaupapa nei, he āta tirotiro i ngā waeine ngahuru mō te roa, te hononga o tētahi ki tētahi, te whakamahi i ngā taputapu ine, me te whakatau tata i te roa o tētahi mea. Ka whai wāhi mai ko te mitamano, te mitarau, me te mita. Ko te tuhi hoahoa/mahere āwhata tētahi o ngā mahi.

Achievement Objectives
1. Ka whakaoti rapanga whaitake e whai wāhi mai ana: te roa; te horahanga; te rōrahi (kìtanga); te taumaha (papatipu); te koki; te paemahana; te wā; te utu.
2. Ka whakamahi i ngā momo āwhata maha e whakaatu ana i ngā waeine tauoti me ngā waeine hautau.
5. Ka mārama ki te rahi o ngā waeine aro whānui.
6. Ka mārama ki te whaitakenga o tētahi inenga.
Te Hononga ki te Marautanga
Taumata 3
 Te Ine me te Āhuahanga (Te Ine)
Whāinga Paetae 1:
Ka whakaoti rapanga whaitake e whai wāhi mai ana:
te roa; te horahanga; te rōrahi (kìtanga); te taumaha (papatipu); te koki; te paemahana; te wā; te utu.
 
Whāinga Paetae 2:
Ka whakamahi i ngā momo āwhata maha e whakaatu ana i ngā waeine tauoti me ngā waeine hautau.
 
Whāinga Paetae 5:
Ka mārama ki te rahi o ngā waeine aro whānui.
 
Whāinga Paetae 6:
Ka mārama ki te whaitakenga o tētahi inenga.
Ngā Whāinga Ako
Kia mōhio te ākonga ki te:
  • huri i ngā waeine ngahuru nei mō te roa: mitamano (mm), mitarau (cm), mita (m)
  • whakamahi taputapu ine
  • whakatau tata i te roa o tētahi mea
  • tuhi hoahoa āwhata
Ngā Rauemi

taura ine/wīra ine

Whārangi Mahi 1

Whārangi Mahi 2

ruri mita

Poumahi 1

pepa tukutuku

Poumahi 2

Poumahi 3

He Rārangi Kupu
hoahoa āwhata scale diagram
mahere āwhata scale map
waeine unit of measurement
waeine ngahuru metric unit of measurement
Hei Raupapa I Ngā Mahi Ako
  1. Ko te mahi tuatahi, he tirotiro i te hononga i waenganui i ngā waeine ngahuru mō te roa, arā, te mitamano, te mitarau, me te mita.

 

Te mahi a te pouako He tauira kōrero mā te pouako
Hoatu he ruri mita ki ngā ākonga (tētahi pea mā ia takirua). Me whakaatu ngā mitamano (mm), me ngā mitarau (cm) ki te ruri.
Whakawhitiwhiti kōrero mō te hononga o te mitarau me te mita.
Tuhia te ingoa mitarau ki te papa tuhituhi, ka whakamārama ai i te tikanga o te kupu.
Titiro ki te ruri mita. Kotahi mita te roa o tēnei ruri. Ko te mita te waeine matua mō te ine i te roa. He aha ētahi atu waeine e whakaaturia ana ki te ruri? Ko te mitarau (cm, henemita) me te mitamano (mm, mirimita).
E hia ngā mitarau i roto i te mita? 100
Koirā te tikanga o te ingoa mitarau – kotahi rau ngā mitarau kei roto i te mita.
He aha te whārite e hono ana i te mitarau me te mita? 100cm = 1m
Whakamahia te whārite, te ruri rānei hei huri i ngā mitarau hei mita, hei huri hoki i ngā mita hei mitarau. 200cm = ?m
500 cm = ?m
1 000 cm = ?m
50 cm = ?m
150 cm = ?m
3m = ?cm
7m = ?cm
2.5m = ?cm
3/4 (.75)m = ?cm
Whakawhitiwhiti kōrero mō te hononga o te mitamano me te mita.
Tuhia te ingoa mitamano ki te papa tuhituhi, ka whakamārama ai i te tikanga o te kupu.
Titiro anō ki te mita ruri. E hia ngā mitamano kei roto i te mita? 1 000
Koirā te tikanga o te ingoa mitamano – kotahi mano ngā mitarau kei roto i te mita.
He aha te whārite e hono ana i te mitarau me te mita? 1 000cm = 1m
Whakamahia te whārite, te ruri rānei hei huri i ngā mitamano hei mita, hei huri hoki i ngā mita hei mitamano. 3 000mm = ?m
5 000mm = ?m
10 000mm = ?m
500mm = ?m
2 500mm = ?m
250mm = ?m
2m = ?mm
6m = ?mm
1.5m = ?mm
3/4 (0.75)m = ?mm
Whakawhitiwhiti kōrero mō te hononga o te mitamano me te mitarau. Titiro anō ki te ruri mita. Tohua mai te kotahi mitarau (cm). E hia ngā mitamano (mm) i roto i te mitarau (cm)? 10 He aha te whārite e hono ana i te mitamano me te mitarau? 10mm = 1cm
Whakamahia te whārite, te ruri rānei hei huri i ngā mitamano hei mitarau, hei huri hoki i ngā mitarau hei mitamano. 30mm = ?cm
100mm = ?cm
1 000mm = ?cm
5mm = ?cm
45mm = ?cm
2cm = ?mm
6cm = ?mm
1.5cm = ?mm
200cm = ?mm
Hoatu te Whārangi Mahi 1 (PDF, 100KB) hei whakaoti mā ngā ākonga.
  1. Ko te mahi tuarua, he tirotiro i te waeine e tika ana hei ine i ētahi mea, he whakatau tata hoki i te roa o aua mea.

 

Whakawhitiwhiti kōrero mō te waeine e tika ana hei ine i ētahi mea pērā i te whānui o tētahi pene rākau Tangohia tētahi pene rākau. He aha te waeine hei ine i te whānui o te pene rākau? Ko te mitamano.
He aha e tika ai te mitamano? Nā te mea he iti tonu te pene rākau, he iti hoki te waeine mitamano.
Ki tō titiro e hia mitamano te whānui o te pene rākau. Whakatau tata i te whānui o te pene rākau.
Inea ināianei. E hia mitamano? E tika ana kia hāngai te kore o te ruri ki tētahi taha o te pene rākau, ka āta tirotiro i te tohu i te ruri i tērā atu taha o te pene rākau.
Kia pērā anō te mahi mō:
  • te roa o tētahi pukapuka
  • te roa o tētahi motukā
 
Hoatu te Whārangi Mahi 2 (PDF, 100KB)hei whakaoti mā ngā ākonga.
  1. Ko te mahi mō te roanga atu o te wiki, he tuku i ngā rōpū ākonga ki ngā Poumahi e toru e whai ake nei. Kia rua pea ngā rangi hei whakaoti i ia Poumahi:

Poumahi 1(PDF, 76KB)

Whāia ngā tohutohu nei ki te tuhi hoahoa āwhata o te akomanga.
Me tuhi noa i tētahi pikitia o ngā mea matua i tō akomanga – ko te tirohanga ā-manu. Arā, ko te tirohanga mai i runga kāore he tuanui o te akomanga. Tīmata ki ngā pakitara, ngā tari, ngā rūma iti, ngā wharepaku (mēnā e hono ana ki tō akomanga), ngā kāpata nui, te papa tuhituhi. Hei aha noa te tuhi i ngā mea iti noa iho.

Inea ngā mea kua tuhia e koe ki te pikitia – te roa o ngā pakitara, o ngā kāpata, o ngā aha atu kei roto i tō pikitia. Tuhia ngā inenga ki tō pikitia.

Tuhia te hoahoa o tō akomanga ki te pepa tukutuku, kia 1cm te rahi o ngā tukutuku. Me āta whakaaro te āwhata e tika ana. Arā, e hia mita tūturu e rite ana ki ia mitarau (cm) i te hoahoa. Hei tauira, mēnā 15 mita te pakitara roa o te akomanga, e pai ana kia 15cm te roa o taua pakitara ki te hoahoa, kia pai ai te noho o te hoahoa ki te whārangi.

Whakaaturia te āwhata ki tō hoahoa. Hei tauira: 1m = 1cm. Kia pūmau taua āwhata mō ngā mea katoa ka tuhia ki tō hoahoa – kaua e rerekē te āwhata mō te kāpata, mō te papatuhituhi – kia mau te āwhata kotahi mō te katoa o te hoahoa.

Poumahi 2 (PDF, 52KB)

Tohua tētahi ara omaoma huri amio i te papa o tō kura. Kia 1km (1 000m) pū te roa o te ara omaoma, mai i te tīmatanga huri amio ki taua wāhi anō. Whakamahia he koeko hei tohu i te ara, he wīra ine, he taura ine rānei hei ine i te ara. Tohua te hauwhā, te haurua me te toru hauwhā o te ara omaoma.

Whakaaturia te ara omaoma ki tētahi mahere o tō kura. Whakaaturia ngā wāhanga katoa o te ara me te roa o ia wāhanga.

Poumahi 3 (PDF, 64KB)

Whāia ngā tohutohu nei ki te tuhi i tētahi mahere āwhata o tō kura.

Tuatahi, me tuhi noa i tētahi pikitia ā-manu o ngā whare o tō kura me ngā paetaha. Anō nei kei runga koe i te rangi e tiro iho ana. Tuhia ngā pakitara o ngā whare me ngā paetaha o te kura.

Tuarua, inea te roa o ngā paetaha, ngā pakitara me ngā tāwhitiwhiti o ngā whare. Tuhia atu ngā inenga ki tō pikitia.

Tuhia te mahere o tō kura ki te pepa tukutuku. Me āta whakaaro te āwhata e tika ana kia pai ai te noho o te mahere ki te whārangi. Hei tauira, mēnā ko te 100m te inenga roa rawa o tētahi paetaha o te kura, kia 20cm te roa o taua paetaha ki te mahere. Arā te āwhata 100m = 20cm (he rite tēnei ki te āwhata 1m = 2mm).

Add to plan

Log in or register to create plans from your planning space that include this resource.


Taumata 3