Tauhono Takirua

Hei Whakarāpopoto

I tēnei kōwae ako ka tūhurangia ngā tauhono takirua o ētahi tau, tae atu ki te 10. Ka whakamahi rauemi hei whakaatu i te horopaki o ngā rapanga, ka tuhi hoki i ngā tauhono takirua hei tāpiritanga.

Te Hononga ki te Marautanga
Taumata 1
Te Tau me te Taurangi (Te Mātauranga Tau me ngā Rautaki Tau)
Whāinga Paetae 1:
Ka mōhio ki ngā tauoti 0–100:
  • te whakaingoa i ngā tohutau;
  • ngā raupapa tatauranga whakamua, whakamuri hoki;
  • ngā tikanga uara tū:
  • te rima me ngā tauhono;
  • ngā tauhono o te tekau;
  • te tekau me ngā tauhono;
  • ngā tau ngahuru;
  • te maha o ngā tekau me ngā tahi kei roto i tētahi tau;
  • te rahi me te hanga o tētahi tau.
Whāinga Paetae 3:
Ka whakaoti rapanga e whai wāhi mai ana te tauoti me te hautau māmā, ka whakamārama hoki i te rautaki:
  • rautaki tatau;
  • rautaki whakarōpū;
  • rautaki tohatoha ōrite.
Ngā Whāinga Ako

Kia mōhio te ākonga ki te:

  • wāwāhi i ngā tau i raro iho i te 10 ki ō rātou tauhono takirua
  • whakatauira i te horopaki o tētahi rapanga ki te rauemi
  • tuhi tāpiritanga hei whakaatu i ngā tauhono takirua o tētahi tau
Ngā Tikanga Pāngarau

E rua ngā kaupapa pāngarau matua ka tūhurangia i tēnei kōwae ako:

  1. Ehara i te mutunga kore ngā tauhono takirua o tētahi tau. Arā, ka taea te tautohu ngā tauhono takirua. Hei tauira, ko ngā tauhono takirua o te whā: 0 + 4, 1 + 3, 2 + 2, 3 + 3, 4 + 0.
  2. Ko ia tau o ngā tauhono takirua e tohu ana i tōna hoa. Hei tauira, mēnā ko te 3 tētahi o ngā tau o tētahi tauhono takirua o te 5, ko te 3 tōna hoa, arā, 2 + 3 = 5.
Kia maha tonu ngā tūhuratanga a te ākonga i ngā tauhono takirua o tētahi tau. Ina he putuputu te kitea ko te 3 te hoa takirua o te 2 hei tauhono mō te 5, kātahi pea ka noho tangata whenua ki te pūmahara o te ākonga.
 
Mō tēnei kōwae ako, ko te ‘tatau i te katoa mai i te kotahi’ te rautaki matua hei whakamahi mā te ākonga (Kaupae 3 o Te Mahere Tau).
 
Te Mahere Tau o Te Poutama Tau
Kaupae 2
Ngā Rauemi
he porotiti

he rākau ātārangi

Whārangi Tārua 1

He Rārangi Kupu

tauhono takirua
additive number pairs
meka tāpiritanga
addition facts
Hei Raupapa I Ngā Mahi Ako

1.      Ko te mahi tuatahi, he whakamahi rauemi hei tūhura i ngā tauhono takirua o tētahi tau, me te tuhi anō i aua takirua hei meka tāpiritanga.

Ngā tohutohu
He tauira whakawhitinga kōrero
Whakamahia he rauemi hei whakaatu i te horopaki o te rapanga nei:
 
E 2 ngā pātiki a Kaipāmu Horomona, e 5 ana hipi. E hia ngā hipi ka taea e Horomona te hoatu ki ia pātiki?
 
Anei ētahi pepa e rua hei tohu i ngā pātiki a Kaipāmu Horomona. Anei ētahi hipi e 5. E Wini, māu e hoatu ngā hipi ki ngā pātiki.
 
E hia ngā hipi ki ia pātiki e Wini? E 4 ki tēnei, kotahi ki tēnei.
 
E hia katoa ngā hipi? E 5.
 
Koia tētahi o ngā takirua o te rima, te 4 me te 1. Māku e tuhi ki te papa tuhituhi.
Ngā takirua o te 5:
4 + 1 = 5
 
E Maka, kei a koe ināianei – māu e hoatu ngā hipi e 5 nei ki ngā pātiki e rua. Ka hia ki ia pātiki? E rua ki tētahi pātiki, e 3 ki tētahi.
 
Anei te takirua a Maka mō ngā hipi e rima:
Ngā takirua o te 5:
4 + 1 = 5
2 + 3 = 5
 
Mēnā karekau he hipi i hoatu ki tēnei pātiki, ka hia ngā hipi ki tērā o ngā pātiki? E rima, ko ngā hipi katoa ki tērā pātiki.
 
He aha tēnā takirua o te rima? Ko te 0 me te 5.
Ngā takirua o te 5:
4 + 1 = 5
2 + 3 = 5
0 + 5 = 5
 
Kia pērā tonu te haere o ngā mahi kia oti katoa ngā tauhono takirua mō te 5. Ko te Whārangi Tārua 1 (PDF, 65KB) hei whakaoti mā ngā ākonga, hei whakarāpopoto i ngā tauhono takirua o te 5.
 
2.      I te rangi tuarua, me hoki anō ki te tirotiro i ngā tauhono takirua o te 5, engari mā ētahi horopaki kē atu. Me whakatauira ngā tauhono takirua ki te rauemi, kātahi ka tuhi ai. Anei ētahi horopaki:
 
E 2 ngā ipu aihikirīmi, e 5 ngā porotiti. E hia ngā porotiti ka taea te hoatu ki ia ipu?
 
E 2 ngā waka, tokorima ngā tāngata. Tokohia ngā tāngata ka haere mā runga ia waka?
 
E 5 ngā matimati, ko ētahi e toro ana, ko ētahi e piko ana. E hia e toro ana, e hia e piko ana?
 
E rua ngā pūkoro i te tarau o Tuihana, e 5 ngā anga i kohia e ia i te takutai. E hia ngā anga ka hoatu ki ia pūkoro?
 
3.      I te roanga atu o te wiki ka tūhuratia ngā tauhono takirua mō ētahi atu tau, pērā i te 6, te 7, te 8, te 9, me te 10. Me whakatauira ngā tauhono takirua ki te rauemi i te tuatahi, kātahi ka tuhi ai.
 
Hei Whakawhānui
1.     Whakamahia he rākau ātārangi hei whakatauira i ngā tauhono takirua. Hei tauira, koinei ngā tauhono takirua o te 7:
 
 
2.      Hangaia he tūtohi hurahura hei whakaatu i ngā tauhono takirua o tētahi tau. Hei tauira, koinei te tūtohi hurahura hei whakaatu i ngā tauhono takirua o te 6:

Ngā Tauhono Takirua o te Ono
0
1
2
3
4
5
6
         Koinei ngā tau kei muri i ia kāri hurahura:

6
5
4
3
2
1
0
3.      Whakamahia he ngaku kanohi koa hei whakapakari i te mōhio ki ngā tauhono o tētahi tau. Hei tauira, he ngaku kanohi koa tēnei mō te 8:
 
 

         Uhia ētahi o ngā kanohi ka whakawhitiwhiti kōrero ai mō ngä tauhono takirua. Hei tauira pātai:
         E hia katoa ngā kanohi i te ngaku kāri nei?      
         E hia ngā kanohi e kitea ana?
         Nō reira e hia e uhia ana ki te kāri?
         He aha tēnei takirua mō te 8?
 
4.      Tirohia te Rauemi Matihiko nei, Tāhei Punarua:
      http://nzmaths.co.nz/resource/t-hei-tau-punarua

 

Attachments

Log in or register to create plans from your planning space that include this resource.