He Tauira Horopaki Whakaako
He tauira horopaki noa iho ēnei e whai ake nei mō te whakaako i ngā kaupapa pāngarau o roto i tēnei marautanga. Mā te kaiako tonu e tīpako ngā horopaki e hāngai tonu ana ki āna ākonga, hei awhina i a rātou ki te ako i ngā kaupapa o te pāngarau. Hei whakaaro ake:
- Me tūhono ngā akoranga pāngarau ki ngā momo horopaki o te wāhi e noho nei te kura – pēnā he kura ki tai, ki tuawhenua, ki tāone nui rānei
- Me tūhono ngā akoranga pāngarau ki ērā atu wāhanga ako o te kura – pēnā ko tētahi kaupapa pūtaiao (pērā i te awa), pēnā ko tētahi kaupapa tikanga ā-iwi (pērā i te whakahaere paremata), pēnā ko tētahi kaupapa hauora (pērā i te kai tika me te whakapakari tinana).
- Me tūhono ngā akoranga pāngarau ki ngā momo horopaki e taunga ana te ākonga, pērā i te hākinakina, te mahi rorohiko me te mahi toi.
- Whakaaturia ngā horopaki Māori i roto i ngā akoranga pāngarau pērā i te hanga o te wharenui, te kapa haka, te tito pātere me te manaaki manuhiri.
Te Tauanga, Taumata 1
| Tangaroa | Kohikohia he anga, ka whakarōpū ai i runga anō i ngā āhuatanga pērā i te āhua, te nui, te tae, me te wāhi i kitea ai. Whakaaturia ngā rōpū me te maha o ngā anga o ia rōpū ki tētahi kauwhata whakaahua. Tūhuratia tētahi pātai pēnei i tēnei: He aha te kaimoana e tino pārekareka ana ki te hunga tamariki me te hunga pakeke? |