Te Whakatauira Tau Mati-3

Hei Whakarāpopoto

E hāngai ana tēnei kōwae ako ki te rauemi matihiko nei, Te Whakatauira Tau Mati-3. Ko tā tēnei rauemi, he āwhina i te ākonga ki te tūhura i te tikanga uara tū o ngā tau mai i te 0 ki te 999, me te whakatauira i ngā tau ki ētahi whakaahuahanga e mōhio whānuitia ana. E hāngai ana tēnei kōwae ako ki te Kaupae 5 o Te Mahere Tau.

Te Hononga ki te Marautanga
Taumata 2
Te Tau me te Taurangi (Te Mātauranga Tau)
Whāinga Paetae 1:
Ka mōhio ki ngā tauoti 0–1 000:
  • te whakaingoa i ngā tohutau;
  • ngā raupapa tatauranga whakamua, whakamuri hoki;
  • ngā tikanga uara tū;
  • te maha o ngā tahi, ngā tekau, me ngā rau kei roto i tētahi tau;
  • te rahi me te hanga o tētahi tau;
  • ngā tikanga o te taurua me te taukehe.
Ngā Whāinga Ako

Kia mōhio te ākonga ki:

  • ētahi whakaahuahanga o ngā tau mai i te 0 ki te 999;
  • te whakatauira i ngā tau ki ngā rauemi uara tū.

E ako ana ahau i te tikanga o ngā mati i roto i ngā tau 0 – 1000

 

Ngā Tikanga Pāngarau

Te Mahere Tau o Te Poutama Tau

Kaupae 5
He Rārangi Kupu

mati
digit
pāwhiri
click (computer mouse)
pīni
beans
poro uara tū
place value blocks
putohu
button or icon (on computer screen)
rākau mati
fairy sticks
rauemi matihiko
digital learning object
takatātai
abacus
tuhinga roha
expanded written form
tukuoro
loudspeaker
tūtohi uara tū hurahura
place value flip chart
uara tū
place value
whakaahuahanga
representation
whare uara tū
place value house
Hei Raupapa I Ngā Mahi Ako
Te Rauemi Matihiko Te Whakatauira Tau Mati-3.
E rua ngā whakamahinga o te rauemi matihiko nei:
  1. Mā te ākonga tonu e whakauru tētahi tau, ā, ka whakaaturia taua tau ki ngā poro uara tū, ki te kupu ā-tuhi, ki te whare uara tū, ki te tuhinga roha, ki te takatātai anō hoki. Mā te pāwhiri anō i te pūtohu tukuoro, ka rangona te tau e pānuihia ana (reo ā-rorohiko nei).
  2. Ka tonoa te ākonga kia whakaatu i tētahi tau ki ngā poro uara tū. Ka tukuna he paku āwhina mēnā ka hapa.
Ngā Rauemi Matihiko
Kei tēnei wāhi i te ipurangi te rārangi mai o ngā rauemi matihiko katoa kua tuhia ki te reo Māori: http://www.nzmaths.co.nz/node/1472
 
Ko ētahi o ngā rauemi matihiko (ngā mea o nzmaths) e wātea ana ki te katoa, mā te pāwhiri noa i te pūtohu. Ko ētahi atu o ngā rauemi matihiko (ngā mea o The Le@rning Federation), me rēhita kē tō kura, kātahi koe ka uru atu ai.
 
Koia nei te wāhi noho o te rauemi matihiko Te Whakatauira Tau Mati-3, e hāngai ana ki tēnei kōwae ako: http://www2.nzmaths.co.nz/maori/LO/WhakatauiraTau/numbersMI123.html 

I Mua i te Whakamahinga o te Rauemi Matihiko Te Whakatauira Tau Mati-3

Kia mārama te ākonga ki te whakaatu tau ki ngā momo rauemi uara tū, pērā i te poro uara tū me te whare uara tū. Ko te kōwae ako o nzmaths Kia Ū Te Mātauranga Tau (http://www2.nzmaths.co.nz/frames/KowaeAko/KiaUTeMataurangaTau/KiaUTeMataurangaTau.aspx) , he akoranga e hāngai ana ki te uara tū o ngā tau mati-2. I tēnei kōwae ako, ka taunga te ākonga ki te whakaatu tau ki te whare uara tū me ētahi atu rauemi.
 
Ka Mahi Tahi te Pouako me tētahi Rōpū Ākonga (ki te hanga, ki te whakatauira hoki i tētahi tau)
Huakina te rauemi matihiko Te Whakatauira Tau Mati-3, ka whakamārama ai i tōna kaupapa ki te whakaatu i ngā uara tū o ngā mati o tētahi tau mati-3.
 
Pāwhiria ngā pere hei whakapiki, hei whakaheke rānei i te tau, kia tae atu ki te tau e hiahiatia ana.
 
Tīmata i te tahi, ka piki ai kia kitea te huri o te tae i te 6. Mā te huri o te tae, he māmā te kite atu i te 5, me te tatau ake i reira ki te 6, te 7, te 8 me te 9.
 
Ina tae atu ki te 10, ka huri ngā poro takitahi hei rākau kotahi i te uara tū o te 10.
 
Whakawhitiwhiti kōrero mō te whakaatu i te 11, me te heke whakamuri anō ki te 10, te 9, heke iho. Āta mātakihia te huri o ngā poro uara tū hei whakaatu i ngā tau.
 
Tonoa ngā ākonga kia whakamārama i te āhua o ngā poro uara tū hei whakaatu i te tau 250, kātahi ka whakaaturia ki te rauemi matihiko. Kia pērā anō mō te 305 me ētahi atu tau. Ko te mea nui kia kite ngā ākonga i te huringa o ngā poro tahi hei poro tekau, me te huringa o ngā poro tekau hei poro rau.
 
Pāwhiria te pere whakatematau o raro kia kitea ai te tau e whakaaturia ana ki te whare uara tū, hei tau roha, ki te takatātai hoki. Whakawhitiwhiti kōrero mō te whakaatu i ngā uara tū o tētahi tau ki ēnei rauemi.
 
He mea nui kia āta tirohia ngā kupu Māori mō tētahi tau, ina te kitea o ngā tahi, ngā tekau me ngā rau.
 
Ka Mahi Tahi te Pouako me tētahi Rōpū Ākonga (ki te whakatauira i tētahi tau)
Ka pāwhiria te mataono tau i te kokonga raro mauī o te mata rorohiko. Ka puta ngā kupu o tētahi tau hei whakaatu mā te ākonga ki ngā poro uara tū.
 
Ina pāwhiria te pūtohu tukuoro, ka rāngona te tau e pānuihia ana (e te reo rorohiko).
 
Tonoa tētahi ākonga ki te hanga i te tau mā te whakamahi i ngā pere. Ina hapa te ākonga ka puta ētahi kōrero hei āwhina i a ia.
 
Ina pāwhiria te pere whakararo i te pūtake o te mata rorohiko, ka hoki anō ki te whakatauira i te tau ka hangaia e te ākonga
 
Te whakaatu tau ki te rauemi uara tū
He maha tonu ngā momo rauemi uara tū hei tūhura mā te ākonga i te uara tū o ngā mati o tētahi tau.
 
Hei tauira: ko ngā poro uara tū; ko ngā pīni me ngā ipu; ko ngā rākau mati, ko te takatātai, ko te whare uara tū, ko te tūtohi uara tū hurahura.
 
He whaihua mēnā ka tūhura te ākonga i ēnei rauemi katoa.
 
Ka Mahi Takitahi, Takirua rānei ngā Ākonga
Ina taunga te ākonga ki te rauemi matihiko nei, he pai noa iho kia mahi takitahi, takirua rānei ki te whakatauira i ētahi tau, he mahi wehe kē i te pouako.
 
Hei Whakawhānui

Log in or register to create plans from your planning space that include this resource.