Hei Whakarāpopoto

Ko te kaupapa nei, he tirotiro i te whakamahinga o te Excel, te pūmanawa rorohiko matua mō tēnei mea te ripanga.

Te Hononga ki te Marautanga
Taumata 4
Te Tauanga (Te Tūhuratanga Tauanga)
Whāinga Paetae 1:
Ka whai i ngā tikanga mō te tūhuratanga tauanga e whai wāhi mai ana te raraunga whakarōpū matatini, te raraunga ine, me te raraunga houanga:
  • ka whakatakoto pātai, tāpaetanga kōrero rānei;
  • ka whakatau i ngā taurangi hei ine;
  • ka whakatau i te tukanga kohikohi raraunga;
  • ka kohikohi raraunga;
  • ka wehewehe raraunga;
  • ka hanga whakaari raraunga e whaitake ana;
  • ka whakatairite i te āhua o ngā tuari raraunga (ngā wēanga me te hora o ngā raraunga);
  • ka whakaputa kōrero mō te pātai i tūhuratia;
  • ka mārama ki ngā tikanga matatika e hāngai ana.
Ngā Whāinga Ako
Kia mōhio te ākonga ki te:
  • hanga i tētahi ripanga i te pūmanawa rorohiko Excel
  • whakamahi whārite hei whakatutuki tātaitanga i tētahi ripanga kua hangaia ki te pūmanawa rorohiko Excel
  • whakaputa i ngā momo kauwhata i tētahi ripanga kua hangaia ki te pūmanawa rorohiko Excel
  • whiriwhiri i te momo kauwhata e pai ana mō tētahi huinga raraunga
Ngā Tikanga Pāngarau
  • Ko tā te ripanga he whakaatu, he pupuri i t/ētahi huinga raraunga me ōna wehewehenga.
  • Ko ngā pou me ngā kapa ngā wāhanga matua o tētahi ripanga, ā, ka noho mai ngā raraunga ki ngā pou me ngā kapa.
Ngā Rauemi
Tūtohi 3

Tūtohi 2

Tūtohi 1

Tūtohi 4

Te Āhua o te Ripanga

he rorohiko me te pūmanawa rorohiko Excel

He Rārangi Kupu

āheinga function
hōtaka programme
kapa row
kōnae file
miramira highlight
pae whakahaere tool bar/control bar
pātuhi key (on a computer keyboard)
pāwhiri click
pou column
pūmanawa rorohiko computer software
pūtohu button (on screen of computer)
raraunga data
ripanga spreadsheet
tapawhā mīharo magic square
tūtohi table (of data)
wehenga cell
Hei Raupapa I Ngā Mahi Ako
  1. Ko te mahi tuatahi, he titiro ki ngā wāhanga matua o te ripanga me te tuhi raraunga ki ōna wehenga.

  1. Te mahi a te pouako
He tauira kōrero mā te pouako
Whakaaturia te Tūtohi 1 (PDF, 67KB), ka whakamārama mai ai i tana mahi ki te pupuri raraunga. Titiro ki te whakaaturanga nei. He tūtohi te ingoa.
He aha ki ō koutou whakaaro te kaupapa o tēnei tūtohi?
Āe, i tukuna te pātai ki tētahi rōpū tāngata– ‘He aha te momo kai e tino manakohia ana’. Ka whakaaturia te momo kai me te tokomaha tāngata ki te tūtohi. He aha ētahi kōrero e tino kitea ana i te tūtohi?
Ko te hāngi te momo kai e tino manakohia ana. Kāore e tino manakohia ana te kai Makitānara.
Tokohia ngā tāngata katoa o te rōpū?
Pēhea koe i mōhio ai 21 ngā tāngata katoa?
Whakamāramatia he aha tēnei mea te ripanga. Ko te Excel tētahi o ngā kaupapa kei runga i ā tātou rorohiko. He momo tūtohi kei roto i te Excel, he ripanga te ingoa. Mā te tuhi ripanga ki te Excel e māmā ai te whakaputa kauwhata. E toru ngā hīkoi matua o te Excel:
  1. He kohi mai i ētahi kōrero mō tētahi kaupapa, (ka kīia he ‘raraunga’ ēnei kōrero).
  2. He tuhi i aua raraunga ki te ripanga.
  3. He whakaputa kauwhata.
Whakaaturia Te Āhua o te Ripanga, ka whakawhitiwhiti kōrero mō ngā pātai nei.. Taihoa nei ka tirotiro i te ripanga i te rorohiko. Koia nei te āhua. Ko ōna wāhanga matua, ko ngā pou, ko ngā kapa, ko ngā wehenga.
He pēhea nei te tapa i ngā kapa?
He pēhea nei te tapa i ngā pou?
He pēhea nei te tapa i ngā wehenga?
E hia ngā pou e taea ana mō tētahi ripanga?
E hia ngā kapa e taea ana mō tētahi ripanga?
Tukuna ngā tamariki ki te huaki i te Excel ki te rorohiko. He pai pea te mahi takirua. Haere ki te wāhi o te rorohiko e rārangi mai ana ngā hōtaka. Ka kitea te Excel ki reira. Pāwhiria. Huakina. Tūhurangia te ripanga ka puta mai.
Me pēhea te tuhi raraunga ki tētahi wehenga o te ripanga?
Me pēhea te whakatika i tētahi raraunga mēnā i hē te patopato?
Tuhia te tūtohi e whakaatu ana i te momo kai e tino manakohia ana ki te ripanga.
Me pēhea te pupuri i te ripanga ki tētahi kōnae i te rorohiko?
Mā ngā tamariki e whakaaro ētahi pātai hei tūhura, hei kohi raraunga. Ka tuhia aua raraunga ki te ripanga rorohiko. Anei ētahi tauira pātai:
  • Te kaiwaiata e tino manakohia ana
  • Te hākinakina e tino manakohia ana
  • Te tāroaroa
  • Te hoto manawa whakatā
  • Te tere ki te oma i te 40m
  1. Ko te mahi tuarua, he titiro ki te whakamahinga o te whārite hei tātai i te tapeke o ētahi wehenga o te ripanga.

Te mahi a te pouako He tauira kōrero mā te pouako
Ārahia ngā tamariki ki te kimi i te tapeke o ētahi wehenga o te ripanga. Arā i te tuatahi, ka tuhia te katoa o ngā wehenga e tāpirihia ana. Ka whakamahia tētahi o ngā ripanga i oti i te rā tuatahi. Whakakāngia te rorohiko, haere ki te wāhi e noho ana te ripanga i tuhia inānahi e pā ana ki te momo kai e tino manakohia ana. Huakina taua ripanga.
Ko tētahi āheinga o te Excel ko te tāpiri i ētahi o ngā wehenga. Hei tauira, ko te kimi i te tapeke o ngā tāngata katoa.
Ko hea te wāhi tika mō te tuhi i te tapeke? Āe, ki raro iho i te ‘2’ mō te kai Hainamana. Pāwhiria taua wehenga.
Tuhia he tohu ōrite (=). Koirā hei tohutohu i te rorohiko he tātaitanga kei te haere mai.
Whai muri i te tohu ōrite, tuhia te tāpiritanga. Ka whakamahia ngā ingoa o ia wehenga. Arā:
=B2+B3+B4+B5+B6+B7 Kātahi ka patoa te pātuhi ‘Enter’. Ka puta te tapeke ki te wehenga i pāwhiria e koe i te tuatahi (arā, B8)
Tūhuratia ka ahatia te tapeke mēnā ka whakarerekēngia tētahi o ngā tau Haere ki te wehenga B2 o te ripanga e pā ana ki te kai e tino manakohia ana. Mēnā ko te 9 kē te tau e tika ana, ka pēhea te whakangaro atu i te 7 me te tuhi i te 9?
Mahia kia pērā. Hurihia te 7 hei 9. Tirohia ka ahatia te tapeke o ngā tau kei te wehenga B8.
Tohua ngā tamariki ki te hanga i tētahi tapawhā miharo ki te ripanga. Whakamahia te āheinga o te Excel ki te tātai i te tapeke o ētahi tau. Huakina tētahi ripanga hou. Tuhia tētahi o ngā tau 1 ki te 9 ki ia wehenga, A1, A2, A3, B1, B2, B3, C1, C2, C3.
Tuhia ki ngā wehenga A4, B4, C4 te whārite hei tātai i te tapeke o ngā pou.
Tuhia ki ngā wehenga D1, D2, D3 te whārite hei tātai i te tapeke o ngā kapa.
Ko te mahi ināianei he whakarerekē i ngā tau kei ngā wehenga A1, A2, A3, B1, B2, B3, C1, C2, C3, kia ōrite te tapeke o ngā pou me ngā kapa katoa. E tika ana kia kotahi anake te whakamahinga o ia tau 1 ki te 9.
Whakamāramatia te huarahi poto hei tātai i te tapeke o ētahi tau. Huakina tētahi ripanga hou. Tuhia ētahi tau ki ngā wehenga mai i te A1 ki te A23.
He roa rawa te tuhituhi i te whārite A1 + A2 + A3 … He huarahi poto tā te Excel. Ka whakamahi te kupu ‘SUM’ he kupu Ingarihi tēnei he ōrite te tikanga ki te kupu ‘tapeke’.
Tuhia te tohutohu nei ki te wehenga A24. SUM(A1:A23) He tohutohu tēnei ki te rorohiko kia tāpirihia ngā tau katoa mai i te wehenga A1 ki te wehenga A23.
Tuhia ētahi tau ki ngā wehenga A1, B1, C1, D1, E1. Whakamahia te tohutohu SUM hei tātai i te tapeke o ēnei tau.
Tohua ngā tamariki ki te tuhi i te Tūtohi 2 (PDF, 56KB) ki tētahi ripanga. Huakina tētahi ripanga hou. Anei ngā raraunga hei tuhi atu ki te ripanga. Hei aha noa te tuhi i te tohu tāra.
He aha ki ō whakaaro te kaupapa o te ripanga?
Āe rā. Ki te pou mauī nei ko te utu o ngā kōpae pūoro e hokona ana i tētahi toa. Ki te pou matau, ko te maha o tēnā o tēnā i hokona i te rā tuatahi o te wiki.
Whakamāramatia me pēhea te huri i te tau noa hei tāra me te hēneti. Pāwhiria te pou A, ka miramiratia ngā wehenga katoa o taua pou. Pāwhiria te kupu ‘Format’ i te pae whakahaere o runga. Haere ki te ‘Style’, ki reira āta kimi ai i te pūtohu hei huri i ngā tau o te pou A ki te tāra me te hēneti.
Tūhuratia me pēhea e oti ai tētahi whakareatanga i te ripanga. Kāore e kore ka hiahia mōhio te tangata nōna te toa, he aha te tapeke o ngā moni i utua hei hoko i ngā kōpae pūoro. Me pēhea ia e mōhio ai ki te tapeke o te utu mō ngā kōpae $10.95 te utu?
Ka tika hoki. Whakareatia te utu (tekau tāra me te iwa tekau mā rima hēneti) ki te maha o ngā kōpae i hokona, arā, ki te 17.
Pāwhiria te wehenga C2. Koirā te wāhi tika mō te tapeke o te utu mō ngā kōpae pūoro he $10.95 te utu.
Tīmata ki te tohu ōrite (=). Hei tohutohu tēnei i te rorohiko he tātaitanga kei te haere mai. Whai muri i te tohu ōrite, ko te wehenga tuatahi o te whakareatanga, arā, ko te A2. Tuhia te whetūriki (*) hei tohu i te whakareatanga, kātahi ko te wehenga tuarua o te whakareatanga, arā ko te B2. Koinei te katoa o te whārite: =A2*B2.
Patoa te pātuhi ‘Enter’ ka puta ai te otinga o te whakareatanga ki te wehenga C2.
Tūhuratia te whakamahinga o te ‘copy’ me te ‘paste’ hei whakaoti i ērā atu o ngā whakareatanga. Ko te mahi ināianei, he whakaoti i ngā whakareatanga katoa o te ripanga hei tātai i te katoa o te utu mō ia momo kōpae. Engari he mahi nui ki te tuhi i tētahi whārite mō ia whakareatanga.
Pāwhiria te wehenga C2 – kei reira te whārite tuatahi i tuhia e koe. Māu tonu e kimi, me pēhea te kape i te whārite, me te tārua anō ki te wehenga C3.
Āta tirohia ka ahatia te whakareatanga.
Āe rā, ka whakareatia ngā tau i roto i ngā wehenga A3 me B3.
Whakaotia ngā whakareatanga katoa o te ripanga.
Ko hea te wehenga hei tuhi i te tapeke o ngā utu mō ngā momo kōpae katoa?
Ka tika, ki te wehenga C8.
Tātaihia te tapake o te katoa o ngā utu.
Hoatu te Tūtohi 3 (PDF, 60KB) hei tuhi mā ngā ākonga ki tētahi ripanga, me te whakaoti anō i ētahi tātaitanga. Tuhia tēnei tūtohi ki te ripanga hou.
Koia nei ngā tātaitanga hei whakaoti ki te ripanga:
  • te katoa o te rōrahi wai i hokona mō ia momo pātara
  • te tapeke katoa o te rōrahi wai i hokona
  • te katoa o te utu mō ia momo pātara
  • te tapeke katoa o te utu
  • te maha o ngā pātara i hokona
Whakawhitiwhiti kōrero mō ētahi o ngā āhuatanga e kitea mai ana i te tūtohi. He tauira pātai ēnei: He aha pea te kaupapa o tēnei ripanga?
Akena pea ko ngā pātara wai i hokona i tētahi toa i tētahi rā o te wiki.
E hia katoa ngā pātara i hokona?
161 Ko tēhea te pātara he maha rawa ngā hokonga?
Ko te pātara 750 ritamani te rōrahi.
Hoatu te Tūtohi 4 (PDF, 58KB) hei tuhi mā ngā ākonga ki tētahi ripanga, me te whakaoti anō i ētahi tātaitanga. Tuhia tēnei tūtohi ki te ripanga hou.
Koia nei ngā tātaitanga hei whakaoti ki te ripanga:
  • te maha o ngā kōpae katoa i hokona i ia rā o te wiki
  • te maha o ia momo kōpae i hokona i te roanga atu o te wiki
  • te katoa o te utu mō ngā hokonga o ia momo kōpae
  • te tapeke o te utu mō te wiki katoa
Whakawhitiwhiti kōrero mō ētahi o ngā āhuatanga e kitea mai ana i te tūtohi. He tauira pātai ēnei: Ko tēhea te momo kōpae i kaha te hokona?
Ko te mea $15.95 te utu.M Ko tēhea te rangi he nui rawa atu ngā kōpae i hokona?
Ko te Rāmere. Ko tēhea te rangi he iti rawa ngā kōpae i hokona?
Ko te Rāpare.
  1. I konei, ka tirohia me pēhea e whakaputa ai he kauwhata i te pūmanawa rorohiko Excel.

Te mahi a te pouako He tauira kōrero mā te pouako
Tukuna mā ngā tamariki e tūhura me pēhea te huri i ā rātou ripanga hei kauwhata.
He pai noa iho te tīmata ki tētahi ripanga māmā, pērā i te Tūtohi 1 (PDF, 67KB).
He pai te mahi takirua me te āwhina tētahi i tētahi.
Huakina te ripanga tuatahi i tuhia mō te momo kai e tino manakohia ana.
Miramiratia ngā wehenga katoa o te ripanga.
Pāwhiria te tohu mō te kauwhata i te pae whakahaere o Excel.
Tūhuratia me pēhea e oti ai tētahi kauwhata porowhita hei whakaatu i ngā raraunga o tēnei ripanga.
He aha ētahi atu kauwhata e taea ana te hanga.
Tūhuratia.
  1. Hei whakaoti i tēnei kōwae ako, ka tukuna mā ngā tamariki e whakahaere tētahi tūhuranga tauanga, ka whakaurua ngā raraunga ki te ripanga rorohiko, ka whakaputaina he kauwhata, ā, ka whakawhitiwhiti kōrero mō ngā āhuatanga e kitea mai ana i ngā kauwhata.
  2. Hei whakawhānui

    Tuhurangia te whakamahinga o te pūtohu Σ hei tātai i te tapeke, i te toharite rānei o ētahi raraunga.
    Tīkina ētahi raraunga mai i te pae tukutuku o Tatauranga ki te Kura, ka whakauru ai ki tētahi ripanga, ka whakaputa anō ai i ētahi kauwhata. www.censusatschool.org.nz

Attachments
Ripanga1.pdf66.68 KB
Ripanga2.pdf56.24 KB
Ripanga3.pdf60.25 KB
Ripanga4.pdf58.02 KB
Ripanga5.pdf84.28 KB

Log in or register to create plans from your planning space that include this resource.