Kia Ū Te Mātauranga Tau

Hei Whakarāpopoto

E rima ngā ngohe o tēnei kōwae ako hei whakapakari i te mātauranga tau o te ākonga.

Te Hononga ki te Marautanga
Taumata 1
Te Tau me te Taurangi (Te Mātauranga Tau me ngā Rautaki Tau)
Whāinga Paetae 1:
Ka mōhio ki ngā tauoti 0–100:
  • te whakaingoa i ngā tohutau;
  • ngā raupapa tatauranga whakamua, whakamuri hoki;
  • ngā tikanga uara tū:
  • te rima me ngā tauhono;
  • ngā tauhono o te tekau;
  • te tekau me ngā tauhono;
  • ngā tau ngahuru;
  • te maha o ngā tekau me ngā tahi kei roto i tētahi tau;
  • te rahi me te hanga o tētahi tau.
Ngā Whāinga Ako
Kia mōhio te ākonga ki:
  • te wewete i ngā ingoa tau
  • te whakamārama i te rahi o tētahi tau
  • te hanga o ngā tau
  • te whakaatu raupapa tau ki tētahi rārangi tau
    Kia mōhio te ākonga ki:
    • te wewete i ngā ingoa tau
    • te whakamārama i te rahi o tētahi tau
    • te hanga o ngā tau
    • te whakaatu raupapa tau ki tētahi rārangi tau
He Rārangi Kupu

Anga tekau
tens frame
Paparau
hundreds board
Paparau hurahura
hundreds flip board
Tāpirihia tētahi tau māmā, ka paremata ai
add a tidy number and compensate
Whare Uara Tū
Place Value House
Hei Raupapa I Ngā Mahi Ako

Ngohe 1

Whāinga:

Kia mārama ki te rahi me te hanga o ngā tau 0 ki te 100.

Rauemi: he rauemi uara tū, (pērā i ngā pīni Aotearoa), he Whare Uara Tū,

He Mahi Mā te Pouako He Tauira Kōrero Mā Te Pouako

Tonoa ngā ākonga ki te whakaatu i tētahi tau ngahuru ki ngā rauemi uara tū (pērā i ngā ‘Pīni Aoteroa’ (beaNZ).


Me āta hono te ingoa o te tau, te tohutau me ngā rauemi.

Whakaaturia mai te 30 ki ngā pīni. E hia ngā rōpū o te tekau? E 3.

Me pēhea te tuhi i te 30?

He aha te tikanga o te mati ‘3’? E mea ana kia toru ngā tekau.

He aha te tikanga o te mati ‘0’? Kāore he pīni takitahi i te taha o ngā tekau e toru.

diagram.
Whakaaturia te tau ki tētahi Whare Uara Tū.

Anei te Whare Uara Tū e whakaatu ana i ngā tahi, ngā tekau me ngā rau

diagram.

Me pēhea te whakaatu i te toru tekau ki te Whare Uara Tū?

diagram.

Whakaaturia tētahi tau ki ngā rauemi uara tū. Tonoa ngā ākonga ki te whakaingoa i taua tau, ki te whakaatu hoki ki te Whare Uara Tū

He aha te tau e whakaaturia ana ki ngā rauemi pīni nei?

diagram.

He aha koe i mōhio ai e 63 katoa ngā pīni? Tatauria ngā ipu o te 10. E 6 ngā rōpū o te tekau, e toru ngā pīni takitahi.


Me tuhi ki te Whare Uara Tū

diagram.

Whakamahia ngā rauemi uara tū ki te whakaatu i te tāpiritanga me te tangohanga o te tekau ki tētahi tau.

Tuhia ngā tangohanga hei whārite.

Anei ngā pīni e whakaatu ana i te 63.

diagram.

He aha tō mahi hei whakaatu i te 53? Tangohia tētahi o ngā rōpū o te tekau.

Me pēhea te tuhi hei whārite? 63 – 10 = 53

Tonoa ngā ākonga ki te kōrero i te tau tekau te rahinga ake te itinga iho rānei.

Kōrero mai te tau tekau te rahinga ake i te 56. Ko te 66.

Kōrero mai te tau tekau te itinga ake i te 18. Ko te 8.

Ngohe 2

Whāinga:

Kia mōhio ki ngā āhuatanga o ngā tau mai i te 0 ki te 100.

Rauemi: he paparau hurahura

He Mahi Mā te Pouako

He Tauira Kōrero Mā Te Pouako

Tuhia tētahi tau (i waenganui i te 0 me te 100) ki tētahi kāri. Uhia te kāri kia kore ai e kitea e ngā ākonga.

Tonoa ngā ākonga ki te tuku pātai mai ki a koe, hei whiriwhiri mā rātou i te tau i tuhia e koe.

Ko tā ngā ākonga he whakakore atu i ngā tau i te paparau i runga i te āhua o ngā whakautu. Hei tauira, ka whakakorea atu ngā taukehe katoa mēnā ka ae atu koe ki te pātai ‘he taurua te tau?’

Kua tuhia he tau ki tēnei kāri. Kei waenganui i te 0 me te 100. Me tuku pātai mai koutou hei whiriwhiri i tēnei tau. Ko tāku he whakautu i te ‘ae’ i te ‘kao’ rānei.

He tauira pātai:
He taukehe te tau?
He taurua te tau?
He taurea o te rima te tau?
He nui ake i te 50?
Kei roto i ngā rua tekau?

Kia oti te whiriwhiri i te tau, ka tonoa ngā ākonga ki te tuhi i ētahi rerenga kōrero e toru hei whakamārama i te tau.

Ka tika, ko te 65 te tau i tuhia ki te kāri. Tēnā tuhia kia toru ngā kōrero mō tēnei tau.

He tauira kōrero:
He taukehe te 65.
He taurea o te rima te 65.
Kei raro te 65 i te 70.
Ehara te 65 i te taurua.

Ngohe 3

Whāinga:

Kia mōhio ki te raupapa o ngā tau mai i te 0 ki te 100.

Rauemi: he aho, he mātiti, he kāri tau (mai i te 0 ki te 100)

He Mahi Mā te Pouako He Tauira Kōrero Mā Te Pouako

Whakairia te aho, ka whakairi anō ai i ētahi kāri tau ki ngā pito.

diagram.

Hoatu he kāri tau ki tētahi ākonga, ka tono ai ki te whakairi i te kāri ki te wāhi e tika ana.

Whakawhitiwhiti kōrero mō te wāhi e tika ana.

Kua whakairia he rārangi tau. Ko te ‘1’ ki te tīmatanga, ko te 60 ki te pito whakamutunga. E Ani, anei te 58. Ki tōu whakaaro, ki hea te wāhi e tika ana hei whakairi i te 58?

diagram.

He paku te iti iho te 58 i te 60, nō reira e tika ana kia pātata atu ki te 60.

Ki hea te wāhi tika mō te 28? He paku te iti iho i te 30, te haurua o te 60. Nō reira ki te taha mau? o te wāhi e hāngai ana ki te haurua o te 60.

diagram.

Ki hea te wāhi e tika ana mō te 15? Ko te 30 te haurua, ko te 15 te haurua o te 30.

diagram.

Kia pērā anō te mahi mō ētahi atu rārangi tau pēnei i ēnei:
diagram.

Ngohe 4

Whāinga:

Kia mōhio ki te rautaki tāpirihia he tau māmā, ka paremata ai hei whakaoti tāpiritanga.

Rauemi:

he rauata (OHP), he poro uara tū

He Mahi Mā te Pouako He Tauira Kōrero Mā Te Pouako

Whakaaturia ngā poro uara tū ki te rauata hei tohu i tētahi tau (pērā i te 56). Uhia ētahi o ngā poro, kia kore ai e kitea e ngā ākonga.

Tonoa ngā ākonga ki te whiriwhiri i te maha o ngā poro e uhia ana.

E whakaaturia ana ētahi poro ki te rauata. Ko te 56 te tau e tohua ana ki ngā poro katoa, engari kei te uhia ētahi o ngā poro. E hia e uhia ana?

diagram.

E rua ngā tekau e kitea mai ana, nō reira e toru ngā tekau e uhia ana (nā te mea e 5 katoa ngā tekau). E rua ngā tahi e kitea mai ana, nō reira e whā ngā tahi e uhia ana (kia eke ki te 6 te katoa o ngā tahi). E 34 te katoa e uhia ana.

Tonoa ngā ākonga ki te āta whakaaro i te whārite e hāngai ana.

He aha te whārite e hāngai ana ki tā koutou mahi?
22 + ? = 56

Tāpirihia te aha ki te 22 kia eke ki te 56?
Tāpirihia te 30, ka 52. E 4 atu anō kia eke ki te 56. Hui katoa ko te 34 i tāpirihia atu.

Whakaaturia te whārite ki tētahi rārangi tau.

Anei te mahi e whakaaturia ana ki te rārangi tau:

diagram.

Ngohe 5

Whāinga:

Kia mārama ki te hanga o ngā tau mai i te 10 ki te 20 (ngā tauhono me te 10), ā, tae atu ki te 50.

Rauemi:

he anga tekau

He Mahi Mā te Pouako He Tauira Kōrero Mā Te Pouako

Whakaaturia ētahi tau ki te anga tekau, ka tono ai i ngā ākonga ki te kōrero i te tau e whakaaturia ana.

E hia katoa ngā ira o tēnei anga tekau? Tekau.

diagram.

He aha koe i mōhio ai? E 5 ngā ira ki ia taha. Kāore he take o te tatau i ngā ira katoa.

E hia katoa ngā ira ināianei? Tekau mā tahi.

diagram.

I tatauria e koe ngā ira katoa? Kāore. Tekau me te tahi ka tekau mā tahi.

He aha te whārite e hāngai ana? 10 + 1 = 11

Kia pērā anō ngā mahi mō ngā tau katoa mai i te 10 ki te 20. Kātahi ko ētahi atu tau tae atu ki te 50.


Log in or register to create plans from your planning space that include this resource.