Taumata 1
Te Ine
Whāinga Paetae 1:
Ka mārama ki ēnei āhuatanga o tētahi mea e taea ana te ine:
- te roa;
- te horahanga;
- te rōrahi (kìtanga);
- te taumaha (papatipu);
- te hurihanga;
- te paemahana;
- te wā;
- te utu.
Kia mōhio te ākonga ki:
- te whakatairite i te roa, te taumaha me te kītanga o ētahi mea
- te reo hei whakatairite i te roa, te taumaha me te kītanga o ētahi mea
|
whakatairite
|
compare
|
|
kītanga
|
capacity
|
|
rōrahi
|
volume
|
|
paenga
|
circumference, perimeter
|
Ngohe 1: Te Roa
- Whārangi Mahi 1
- he aho
Huinga 2: he tātua, he aho (ki te takiwā o te 1 mita te roa), he tūru, he tēpu, he papa tuhituhi
Huinga 3: he kapu, he perēti, he pene, he pōro tēnehi, he kōpae CD
1. Whakawhitiwhiti kōrero mō ngā āhuatanga o ngā mea e taea ana te ine i te roa, me te whakamahi anō i ngā kupu e hāngai ana. Hei tauira:
- Tohua mai te roa o te pene.
- Tohua mai te whānui o te pukapuka.
- Tohua mai te mātotoru o te pukapuka.
- Tohua mai te roa o te pukapuka.
- Ko hea te paenga o te kapu? Huri amio i te kapu, koirā tōna paenga.
- Tohua mai te paenga o te perēti.
2. Tukuna he pātai hei whakatairite mā ngā ākonga i te roa o ētahi mea e rua. Kia māmā te kitea atu e te karu i te mea roa rawa. Hei tauira:
- Ko tēhea te mea roa rawa, ko te mātotoru o te pukapuka , ko te roa o te pene rānei?
- He roa ake, he poto ake rānei te teitei o te tūru me te roa o te pene whītau.
- He aha tētahi mea he roa ake i te rākau karaka?
- He aha tētahi mea he poto ake i te whānui o te pukapuka.
3. Tukuna he pātai hei whakatairite i ētahi mea he āhua pātata te roa. Whakawhitiwhiti kōrero mō te whakamahi i tētahi aho e mōhiotia ai te paenga o tētahi mea porowhita te āhua. Hei tauira:
- Ki tō titiro, ko tētahi te mea roa rawa, ko te pene rākau, ko te pene whītau rānei?
- Whakatakotoria te pene rākau me te pene whītau, tētahi ki raro i tētahi, kia kitea ai ko tēhea te mea roa rawa. He mea nui kia hāngai tonu ngā pito o ngā mea e rua, kia kitea ai ko tēhea te mea roa rawa.
.gif)
- Whakamahia te aho, ka whakaatu mai ai i te paenga o te kapu. Pēhea nei te roa huri amio i te kapu?
- Ki tō titiro he roa ake te paenga o te kapu, he roa ake rānei te whānui o te pukapuka? Whakamahia he aho hei whakatairite.
4. Kia taunga te ākonga ki te whakatairite i te roa o ētahi mea e rua, tonoa rātou ki te whakaraupapa i ētahi mea e toru, e whā rānei, mai i te mea poto rawa ki te mea roa rawa.
5. Hoatu te Whārangi Mahi 1 (PDF, 168KB) hei whakaoti mā ngā ākonga.
- he whārite ine-taumaha
Huinga 1: E toru ngā pouaka he rerekē te rahi, kāore e kitea ana he aha kei roto. He taumaha ake te pouaka iti i te pouaka nui.
Huinga 2: he pōro tēnehi, he pōro kirikiti, he pōro kirihou, he pōro poiwhana, he poihau
Huinga 3: he pukapuka, he pene, he kōpae, he waea pūkoro
Huinga 4: he kapu, he perēti, he pukapuka, he hū
1. Whakawhitiwhiti kōrero mō tēnei mea te taumaha o tētahi mea. Hei tauira:
- Mēnā he tino taumaha tētahi mea he uaua te hiki ake. He aha ētahi mea he uaua te hiki nā te mea he taumaha?
- Titiro ki ēnei pouaka e toru nei. He nui tētahi, he iti tētahi, ko tētahi kei waenganui. Ki ō whakaaro, ko tēhea te mea taumaha rawa?
- Me pēhea tātou e tino mōhio ai ko tēhea te mea taumaha rawa?
- E Tama, hīkina ake ia pouaka. Ki tō rongo, ko tēhea te mea taumaha rawa?
- Nō reira ko te pouaka nui, koirā te mea māmā rawa. Kikī ana te pouaka iti i te kōhatu, koirā i taumaha ai.
2. Tukuna ngā ākonga ki te hiki i ētahi mea e rua, me te āta whakaaro ko tēhea te mea māmā rawa, ko tēhea te mea taumaha. Kātahi ka raupapa ngā mea o ia huinga i runga i tā rātou rongo i te taumaha o tēnā o tēnā, ina hīkina.
3. Whakawhitiwhiti kōrero mō te whakamahinga o te whārite ine-taumaha hei whakatairite i te taumaha o ētahi mea e rua. Hei tauira:
- He taputapu ine-taumaha tēnei, e kitea ai te mea taumaha rawa o ētahi mea e rua. Ka hoatu tētahi o ngā mea ki tētahi pito, ko tētahi ki te pito tuarua. Ko te mea taumaha ka kumea whakararo, ko te mea māmā ki hīkina ake ki runga.
.gif)
- E Wai, hoatu te poi tēnehi ki tētahi pito o te taputapu, ko te poi kirihou ki tētahi. Ko tētahi te mea taumaha rawa?
3. Tukuna ngā ākonga kia whakamahi i te whārite ine-taumaha hei whakatairite i te taumaha o ngā mea o ia huinga. Ka raupapahia ngā mea mai i te māmā ki te mea taumaha. Ka whakaputa kōrero ia ākonga mō te raupapatanga mai o ngā taumaha.
- he mataono rite iti (pērā i te rākau Ātaarangi mā), he kākano, he pīni rānei
Huinga 1: he kapu, he karahe, he pouaka.
Huinga 2: he pākete, he pouaka nui, he pēke kirihou
Huinga 3: ētahi kapu he rerekē te āhua
1. Whakawhitiwhiti kōrero mō tēnei mea te kītanga o tētahi ipu. Hei tauira:
- Titiro ki te ipu nei me te pouaka. Ka taea te whakauru i ētahi mea ki roto hei pupuri mā te ipu mā te pouaka rānei. He aha ētahi mea ka taea te whakauru ki roto?
- Pēnā he kapu, he karahe, he pātara, he pākete, ka taea te whakauru wai hei pupuri mā taua ipu.
- Ko te rahi o te wai ka taea te whakauru ki roto i tētahi ipu kia kī rawa, koirā te kītanga o taua ipu.
- Ki tō titiro, he nui ake te kītanga o te kapu, o te karahe rānei?
- Me pēhea te whakamātau kia tino mōhio ai tātou ko tēhea te mea he nui rawa te kītanga?
- Ko ētahi mea pēnei i te pouaka nei, kāore e taea te whakauru wai ki roto, nā te mea he kāri. Ka māku ana, ka pakaru te pouaka, kua puta te wai ki waho. Ka taea te whakamahi poraka iti pea (kākāno, pīni rānei) hei tirotiro i te kītanga. Ki tō whakaaro, e hia ngā poraka iti nei ka taea te whakauru ki te pouaka? Whakamātauria kia tino kitea ai.
.gif)
2. Tukuna ngā ākonga kia whakaraupapa i ngā mea o ia huinga, mai i te mea he iti te kītanga ki te mea nui te kītanga.
3. Tonoa ngā ākonga kia kimi i ētahi mea, ka whakamātau ai i te kītanga. Hei tauira:
- E Mara, tīkina tētahi mea he tino nui ake te kītanga i te kītanga o tēnei kapu.
- Kimihia tētahi ipu he āhua pātata te kītanga ki te kītanga o te pouaka nei.
- Homai tētahi mea he paku iti iho te kītanga i te kītanga o te kapu.
- Kei hea tētahi mea he āhua rearua ake te kītanga i te kītanga o te kapu?