- Te Pātaka Matihiko me Te Le@rning Federation (TLF)
- Ngā akoranga matihiko reo Māori
- Te rēhita me te whai wāhi atu ki ngā akoranga matihiko
- Te kimi mai i tētahi akoranga matihiko
Te Pātaka Matihiko me Te Le@rning Federation (TLF)
Ko Te Pātaka Matihiko te kūaha e whai wāhi atu ai ngā kura o Aotearoa ki te kohinga akoranga matihiko kua whakaputaina e Te Le@arning Federation (TLF). He kaupapa auaha tonu tēnei e whakamahi ana i ngā momo hangarau hōu hei whakaputa rauemi ako mā runga i te ipurangi. Ko tā te kaupapa nei, he tautoko i te mahi nui a te pouako, he whakapiki i te hunga ākonga o roto i ngā kura o Aotearoa me Ahitereiria. Nā ngā kāwanatanga o Aotearoa, o Ahitereiria whānui, o ngā rohe hoki o Ahitereiria tēnei kaupapa i whakatere.
Ko te akoranga matihiko te tauira kua whāia e Te Le@rning Federation mō ngā rauemi ipurangi. Ko te akoranga matihiko, he kohinga rauemi, pērā i te tuhinga, te whakaahua, te hoahoa, te whakaari, te ataata, te kōrero me te mahi pāhekoheko, kua whakaritea mō runga i te ipurangi. Ko te tino whāinga kia tino kumea te ākonga ki roto i ngā mahi, kia manawa toitoi tonu. Pāwhiria a konei ka puta ai te roanga atu o ngā kōrero mō Te Le@rning Federation (TLF)
Ngā akoranga matihiko reo Māori
Ko te katoa o ngā akoranga matihiko reo Māori e hāngai ana ki te marautanga pāngarau. Tekau mā waru ngā akoranga matihiko pāngarau reo Māori, ā, ka takea mai ēnei i ētahi o ngā akoranga matihiko reo Ingarihi. Ehara i te mea he whakamāori ā-kupu noa iho, engari he whai tonu i te ia o te rauemi. Ko te whāinga matua a Te Le@rning Federation, kia tautoko i te mahi nui a te pouako, kia eke anō ai te ākonga i ngā taumata o te pāngarau. Ko te tūāpapa o ngā akoranga matihiko, ko ngā rangahautanga o nāianei e pā ana ki te mahi whakaako me te ako i te pāngarau. E tino aro ana ki ngā ariā pāngarau he uaua tonu te whakaako, he kukume hoki i te ākonga kia hōhonu tonu ōna whakaaro me āna rautaki whakaoti rapanga pāngarau.
Te rēhita me te whai wāhi atu ki ngā akoranga matihiko
Mā te rēhita tonu e whai wāhi atu ai tētahi kura o Aotearoa ki ngā akoranga matihiko i te Pātaka Matihiko. Pāwhiria a konei kia kite ai koe i te rārangi o ngā kura kua oti kē te rēhita mai (tuhinga PDF). Mēnā kāore anō tō kura kia rēhita mai, me whakaoti ngā wāhanga e rua o te tukanga rēhita, kātahi koe ka āhei atu ki ngā akoranga matihiko. Mēnā kua rēhita kētia tō kura, kua tukuna atu te ingoa whakauru me te kupuhuna. Whakamahia ēnei kupu kia uru atu koe ki Pātaka Matihiko me ngā akoranga matihiko o roto.
Kāore e whakaaehia ngā tāngata o waho atu o Aotearoa kia whai wāhi atu ki ngā akoranga matihiko kei roto i te Pātaka Matihiko.
Te kimi mai i tētahi akoranga matihiko
E hāngai ana te katoa o ngā akoranga matihiko pāngarau reo Māori ki te whenu tau o te marautanga pāngarau o Aotearoa. Kei te whārangi akoranga matihiko o te pae tukutuku o nzmaths e whakaaturia ana ngā taumata o ia akoranga matihiko, ā, mā reira koe e uru atu ai ki te akoranga matihiko e hiahia ana koe. Ko tāu mahi, he pāwhiri noa i te taumata e hiahia ana koe, ā, ka kitea ngā akoranga matihiko e hāngai ana ki taua taumata.
Pāwhiria ‘te roanga atu o ngā kōrero’ kia kite ai koe i ngā whakamārama mō te akoranga matihiko kua tīpakona e koe. Ina pāwhiria tētahi o ngā akoranga matihiko, ka huakina i roto i te matapihi hou. Ka tonoa koe ki te tuhi i te ingoa whakauru me te kupuhuna o tō kura, kātahi koe ka hou atu ki taua akoranga matihiko.