He Tauira Horopaki Whakaako

He tauira horopaki noa iho ēnei e whai ake nei mō te whakaako i ngā kaupapa pāngarau o roto i tēnei marautanga. Mā te kaiako tonu e tīpako ngā horopaki e hāngai tonu ana ki āna ākonga, hei awhina i a rātou ki te ako i ngā kaupapa o te pāngarau. Hei whakaaro ake:

  • Me tūhono ngā akoranga pāngarau ki ngā momo horopaki o te wāhi e noho nei te kura – pēnā he kura ki tai, ki tuawhenua, ki tāone nui rānei
  • Me tūhono ngā akoranga pāngarau ki ērā atu wāhanga ako o te kura – pēnā ko tētahi kaupapa pūtaiao (pērā i te awa), pēnā ko tētahi kaupapa tikanga ā-iwi (pērā i te whakahaere paremata), pēnā ko tētahi kaupapa hauora (pērā i te kai tika me te whakapakari tinana).
  • Me tūhono ngā akoranga pāngarau ki ngā momo horopaki e taunga ana te ākonga, pērā i te hākinakina, te mahi rorohiko me te mahi toi.
  • Whakaaturia ngā horopaki Māori i roto i ngā akoranga pāngarau pērā i te hanga o te wharenui, te kapa haka, te tito pātere me te manaaki manuhiri.

Te Ine me te Āhuahanga, Taumata 3

Te Hanga o te Wharenui
  • Tautohua ngā āhua e kitea mai ana i te hanga o tētahi wharenui me ngā mahi toi o roto.
  • Āta wānangahia te takenga mai o ngā ingoa mō ēnei āhua: tapawhā hāngai, tapawhā rite, tapatoru waerite, tapatoru rite, tapatoru hāngai, tapawhā whakarara, tapawhā whakarara rite, rīpeka ...
  • Tirohia te hangarite o ngā āhua.
  • Tirohia te whakamahinga o ngā āhua hei hanga rōpinepine.
Tirohia:
He Āhua Ahu-2. Nā Te Pou Taki Kōrero i whakaputa i te tau 2005.