Te Kete Ipurangi Navigation:

Te Kete Ipurangi
Communities
Schools

Te Kete Ipurangi user options:


Pāngarau i te Kainga

 

He mea nui te whai wāhitanga mai me te ngākaunui o te hunga mātua me te whānau whānui, e eke ai ā tātou tamariki i ngā taumata o te mātauranga.

He maha tonu ngā momo mahi hei tautoko i ā tātou tamariki ki te ako i te pāngarau, ka mutu, ko te nuinga he mahi noa o ia rā, e whakamahi ana i ngā rauemi o roto i ō tātou kāinga.

Ko tētahi, ko te āta aro ki te pāngarau e karapoti ana i a tātou, e kitea nuitia ana i tō tātou ao, huri ki hea, huri ki hea.

He māmā noa iho te aro, te whakawhitiwhiti kōrero hoki mō ngā āhuatanga pērā i te taurua ki ngā pouaka reta ki tētahi taha o te huarahi, me te taukehe ki tētahi taha.

Ko te aro rānei ki ngā momo āhua e kitea ana i ngā ipu me ngā pākete kai i te hokomaha, pērā i te porowhita, te rango, te poi me te mataono.

Ko tātou katoa ka whakamahi i te tau me te ine i ngā mahi o ia rā, ā, he mea nui kia whakawhitiwhiti kōrero me ā tātou tamariki.

Mā te whakawhiti kōrero mō ngā āhuatanga pāngarau o ia rā, e tipu ai te whakaaro o te tamaiti, he kaupapa pai, he whaihua hoki te pāngarau, ā, ka rata mai.

Tonoa tō tamaiti ki te pānui i te karaka, ki te ine i ngā kai ka whakaurua hei mahi rewena.

Whakawhitiwhiti kōrero mō te utu kōhinu me te maha o ngā rita hei whakakī i te motukā.

Māna anō e kimi ngā utu māmā o roto i ngā pānui hoko kai ka tae atu ki tō pouaka reta.

Mā te mahi tahi a te kāinga me te kura e tino hāpaitia ai te ako pāngarau o ā tātou tamariki kia puta te ihu.

He mea nui kia whakawhitiwhiti kōrero ki ngā pouako i te kura, kia hāpai anō i te mahi kāinga.

Ko tētahi huarahi, ko te tākaro i ngā momo kēmu pāngarau, ko te mahitahi ki te whakaoti rapanga pāngarau, ko te tono rānei kia whakamāramahia e te tamaiti āna whiriwhiringa rapanga pāngarau.

Ko te whakamihi, ko te whakatenatena hoki hei hāpai i ā tātou tamariki, kia māia, kia mauritau ki ā rātou mahi pāngarau.

Ina oti tika tētahi whiriwhiringa pāngarau, mā te menemene noa iho, mā te papaki ringaringa, pokohiwi rānei hei whakamihi, ā, mā konei ka tipu anō te whakaaro pai ki te pāngarau.

He maha ngā rauemi kei te wāhanga whānau o te pae ipurangi o nzmaths, hei mahitahi me tō tamaiti, hei āwhina i a ia ki te ako i te pāngarau.

Tirohia te wāhanga ‘Pāngarau i te Kāinga’, kei reira ētahi whakaaro mō ngā mahi pāngarau o ia rā, me ngā mahi hei hāpai i tō tamaiti i ngā wāhanga katoa o te pāngarau ā-kura, arā, te āhuahanga, te ine, te tauanga, te taurangi me te tau.

Hei whakaaro whakamutunga, he māmā noa iho te whakarite i tētahi ‘kete rauemi pāngarau’ mō tō kāinga.

Ko ngā mea o roto i te kete hei mahi ngahau, hei tākaro mā tō tamaiti, hei āwhina rānei i a ia i āna mahi pāngarau.

Koia nei ētahi rauemi hei whakauru atu ki te kete pāngarau:

•  ko te pepa me te pepa mārō

•  ko ngā momo pene, pene rākau hoki

•  ko te tātaitai

•  ko ngā momo taputapu hei ine i te roa

•  ko ngā momo mahere pērā i te mahere whenua me te mahere huarahi

•  ko te pūkei kāri

•  ko te mataono tau

•  ko te moni tākaro

•  ko te maramataka

•  ko te karaka

•  ko ngā porotiti

Hei whakarāpopoto i ngā kōrero, he maha ngā mahi ka taea e te hunga mātua, e te whānau whānui hei tautoko i te ako pāngarau o ā tātou tamariki:

•  Āwhinatia rātou kia aro ki te pāngarau e kitea nuitia ana i ia rā.

•  Mahia āu ake mahi pāngarau o ia rā kia kitea ai e tō tamaiti. Ko koe hei tauira mōna.

•  Whakaaturia tō ngākaunui ki ā rātou mahi kura.

•  Kia kaha ki te hāpai i a rātou.

Mā tō āwhina, mā tō tautoko e puta ai te ihu o tō tamaiti i āna mahi pāngarau.

Ka tūturu, ka whakamaua kia tina, haumie e, hui e, taiki e!

Right click and choose 'Save As' to save a copy of this video to your computer (mp4, 43.2MB).