Te Kauwhata Pou

Hei Whakarāpopoto

Ko te tuhi me te whakamāori kauwhata pou, kauwhata pou hiato hoki te kaupapa o tēnei kōwae ako.

Achievement Objectives
1. Ka whai i ngā tikanga mō te tūhuratanga tauanga e whai wāhi mai ana te raraunga whakarōpū me te raraunga motumotu: ka whakatakoto pātai; ka kohikohi raraunga; ka wehewehe raraunga; ka hanga whakaari raraunga e whaitake ana; ka whakaputa kōrero hei whak
2. Ka tautohu i ngā tauira me ngā ia e kitea mai ana i roto i tētahi huinga raraunga, i waenganui rānei i ētahi huinga raraunga.
3. Ka arotake i te whaihua o ngā momo whakaari raraunga rerekē hei whakaatu i ngā hua o tētahi tūhuratanga tauanga.
Te Hononga ki te Marautanga
Taumata 3
Te Tauanga (Te Tūhuratanga Tauanga)
Whāinga Paetae 1:
Ka whai i ngā tikanga mō te tūhuratanga tauanga e whai wāhi mai ana
te raraunga whakarōpū matatini, te raraunga motumotu tatau, me te raraunga houanga:
  • ka whakatakoto pātai;
  • ka kohikohi raraunga;
  • ka wehewehe raraunga;
  • ka hanga whakaari raraunga e whaitake ana;
  • ka whakaputa kōrero hei whakautu i te pātai i tūhuratia;
  • ka mārama ki ngā tikanga matatika e hāngai ana.
Whāinga Paetae 2:
Ka tautohu i ngā tauira me ngā ia e kitea mai ana i roto i tētahi huinga raraunga, i waenganui rānei i ētahi huinga raraunga.
 
Whāinga Paetae 3:
Ka arotake i te whaihua o ngā momo whakaari raraunga rerekē hei whakaatu i ngā hua o tētahi tūhuratanga tauanga.
Ngā Whāinga Ako
Kia mōhio te ākonga:
  • ki te pānui, ki te whakamāori kauwhata pou.
  • ki te pānui, ki te whakamāori kauwhata pou hiato
  • ki te tuhi kauwhata pou
  • ki te tuhi āwhata ki te tuaka pou o te kauwhata
Ngā Tikanga Pāngarau
  • E rua ngā tuaka o te kauwhata pou.  Ko te tuaka pae hei whakaatu i ngā rōpū raraunga.  Ko te tuaka pou hei whakaatu i ngā raraunga tau e pā ana ki ia rōpū.
  • Mēnā he tau nui hei whakaatu ki te tuaka pou o te kauwhata me whakamahi āwhata.
  • Ko te kauwhata pou hiato hei whakatairite i ngā huinga raraunga e rua.
Ngā Rauemi
he pepa tukutuku

Kauwhata Pou 1

Kauwhata Pou 2

Kauwhata Pou 3

Kauwhata Pou 4

Kauwhata Pou 5

Kauwhata Pou 6

He Rārangi Kupu

āwhata scale
kauwhata pou bar graph
kauwhata pou hiato composite bar graph
tatau mawhiti-rima count in skip in fives
raraunga data
tuaka pae horizontal axis
tuaka pou vertical axis
tūhuratanga tauanga statistical investigation
Hei Raupapa I Ngā Mahi Ako
  1. Ko te mahi tuatahi he tirotiro, he matapaki i ētahi kauwhata pou.

    Te mahi a te pouako

    He tauira kōrero mā te pouako

    Whakaaturia te kauwhata pou Mā Hea nga Tamariki o Akomanga 1 Haere ai ki te Kura (Kauwhata Pou 6 PDF, 79KB) ka matapaki ai.

    graph.

    He kauwhata pou tēnei.  Ko te mahi a te kauwhata pou, he whakaatu i ētahi mōhiotanga e pā ana ki tētahi kaupapa.

    He aha te kaupapa o tēnei kauwhata pou?  (Ko te whakaatu mā hea ngā  tamariki o tētahi akomanga haere ai ki te kura)

    He aha tātou i mōhio ai ki te kaupapa o te kauwhata?  (Koirā te ingoa.  Ka pānui i te ingoa, ka mārama tātou he aha te kaupapa)

    E rua ngā rārangi matua o te kauwhata.  Ka kīia he tuaka.  Ko te tuaka pae, me te tuaka pou.  Koinei te tuaka pae, koinei te tuaka pou.

    He aha te mea e whakaaturia ana ki te tuaka pae?  (Ko ngā momo haere a ngā tamariki ki te kura)

    He aha te mea e whakaaturia ana ki te tuaka pou?  (Ko te tokomaha o ngā tamariki)

    He aha te tikanga o ngā pou?  (Kua tuhia he pou hei whakaatu i ia momo haere.  Ko te teitei o te pou hei whakaatu i te tokomaha)

    Ko tēhea te momo haere he tokomaha rawa ngā tamariki?  (Ko te pahi)

    He aha koe i mōhio ai?  (Nā te mea koirā te pou teitei rawa)

    Tokohia ngā tamariki haere ai mā runga pahi?  (Tokoono)

    Whakamāramahia mai tō whakautu.  (E hāngai ana te teitei o te pou ki te 6)

    Tokohia kē ake ngā tamariki haere ai mā runga pahikara ki ērā ka haere mā raro?  (Tokotoru te tokomaha ake o ngā tamariki.  Tokorima ka haere mā runga pahikara, tokorua ka haere mā raro, nō reira tokotoru te rerekē.)

    Tokohia ngā tamariki o tēnei akomanga?  He aha koe i mōhio ai?  (Tekau mā waru.  Ka tāpirihia te tokomaha o ngā tamariki o ia momo haere, ko te 18 te tapeke.  Arā tāpirihia te 3, te 2, te 6, te 2, me te 5, ka 18.)

    Ki tōu whakaaro, ko hea te takiwā e tū ana tēnei kura?  (Kei tuawhenua nā te mea he tokomaha ngā tamariki e haere ana mā runga pahi, ko ētahi anō hoki ka haere mā runga hōiho.  Kāore e pērā i ngā kura tāone.)

    Tokohia pea ngā tamariki e noho tata ana ki te kura?  (Tokorua pea.  Koirā ngā mea e haere ana mā raro, kāore pea i te tino tawhiti).

    Hoatu te whārangi mahi Kauwhata Pou 1 (PDF, 99KB) hei whakaoti mā ngā ākonga.  He pai pea te mahi takirua.

  2. Ko te mahi tuarua he tirotiro, he matapaki i te āwhata o te tuaka pou o ētahi kauwhata pou.

    Te mahi a te pouako

    He tauira kōrero mā te pouako

    Whakaaturia te kauwhata pou Mā Hea nga Tamariki o Te Kura o Rangiwhai Haere ai ki te Kura, (Kauwhata Pou 7, PDF, 79KB) ka matapaki ai.

    graph.

     

    Titiro ki te kauwhata pou.  He paku rerekē ki te kauwhata i tirohia inanahi nei.  Kōrero tahi me tō hoa, ka kimi ai i ngā rerekētanga.  (Ko tā te kauwhata o inānahi he whakaatu i ngā tamariki o tētahi akomanga kotahi.  Ko tēnei e whakaatu ana i ngā tamariki katoa o tētahi kura.  He rerekē hoki te tuaka pou.  He tatau mawhiti-rima te whakaatu i te tokomaha.)

     

    He aha i tatau mawhiti-rima ai te whakaatu i te tokomaha o ngā tamariki?  (Nā te mea tokomaha rawa ngā tamariki.  E 37 ngā tamariki haere ai mā runga pahi, kāore e taea te whakaatu te 37 mēnā he takitahi te whakaatu ki te tuaka pou.)

     

    Tokohia e haere ana mā runga pahi?  (Toru tekau mā whitu)

     

    Tokohia e haere ana mā raro, mā runga pahikara rānei?  (E 45.  Tekau mā raro, e 35 mā runga pahikara.)

     

    Tokohia katoa ngā tamariki o tēnei kura?  (Kotahi rau rua tekau.  Ka tāpirihia te tokomaha o ngā tamariki o ia momo haere, arā, 25 + 10 + 37 + 13 + 35, ka rite ki te 120.)

     

    Tekau mā rua ngā tamariki e haere ana ki te kura mā runga aha?  (Mā runga hōhio.)

    Hoatu te whārangi mahi Kauwhata Pou 2 (PDF, 77KB) hei whakaoti mā ngā ākonga.  He pai pea te mahi takirua.

  3. I konei, ka tirohia, ka matapakia te kauwhata pou hiato.

    Te mahi a te pouako

    He tauira kōrero mā te pouako

    Whakaaturia te kauwhata pou Mā Hea nga Tamariki o Te Kura o Rangiwhai me te kura o Aranga Haere ai ki te Kura (Kauwhata Pou 8, PDF, 70KB) ka matapaki ai.

     

    graph.

     

    I ētahi wā, ka whakamahia te kauwhata pou hei whakatairite i ētahi kaupapa e rua.  I tēnei o ngā kauwhata pou, e whakatairitea ana te momo haere a ngā tamariki o te kura o Rangiwhai me ngā tamariki o te kura o Aranga.

    E kitea ana ētahi pou hei whakaatu i te kura o Rangiwhai me ētahi pou hei whakaatu i te kura o Aranga.

    Ka kīia he kauwhata pou hiato.  Ko te kupu hiato e mea ana kua whakahuihuitia ngā mea e rua ki te wāhi kotahi.

    Ko tēhea te tae e whakaatu ana i ngā tamariki o te kura o Rangiwhai, ko tēhea mō te kura o Aranga?  (Ko ngā  pou whero mā te kura o Rangiwhai, ko ngā pou kākāriki mā te kura o Aranga.)

    He aha koe i mōhio ai?  (Koirā te tohu i te taha matau o te kauwhata.)

    Tokohia kē ake ngā tamariki o Aranga e haere ana mā runga motukā, i ērā o Rangiwhai?  (Tokoiwa kē ake.  E 34 o Aranga, e 25 o Rangiwhai e haere ana mā runga motukā.)

    He aha ngā momo haere matua o ngā kura e rua nei?  (Mō te kura o Rangiwhai, ko te pahi me te pahikara, mō Aranga, ko te pahikara me te motukā.)

    He aha te rerekētanga matua o ngā kura e rua nei?  (He tino tokomaha ake ngā tamariki o Rangiwhai e haere ana mā runga pahi, kāore hoki he tamariki o Aranga e haere ana mā runga hōhio.)

    Ki tōu whakaaro, ko hea ngā wāhi e tū ana ngā kura e rua nei?  (Kei tuawhenua a Rangaiwhai nā te mea he tokomaha e haere ana mā runga pahi, ā, ko ētahi e haere ana mā runga hōiho.  Kei te tāone pea a Aranga nā te mea kāore i te tokomaha e haere ana mā runga pahi, karekau tētahi e haere ana mā runga hōiho.)

    Hoatu te whārangi mahi Kauwhata Pou 3 (PDF, 72KB) hei whakaoti mā ngā ākonga.  He pai pea te mahi takirua.

  4. Ka tirohia i konei ngā hīkoi hei tuhi i tētahi kauwhata pou.

    Te mahi a te pouako

    He tauira kōrero mā te pouako

    Whakaaturia te tūtohi mō ngā oma i riro i ētahi kaitākaro tokoono i tā rātou kēmu kirikiti.  Hoatu he tohutohu hei āwhina i ngā tamariki ki te tuhi i tētahi kauwhata pou.

     

    Ngā oma i riro i ētahi kaitākaro i tētahi kēmu kirikiti.

    Ingo

    ngā oma

    Rangi

    53

    Ana

    79

    Hera

    113

    Taki

    12

    Wi

    0

    Ariana

    21

    Tirohia te tūtohi nei.  He aha te kaupapa e whakaaturia ana?  (Ko ngā oma i riro i ētahi kaitākaro tokoono i tētahi o ā rātou kēmu.)

     

    Ko tā tātou mahi, he whakaatu i ā rātou oma ki te kauwhata pou.  He aha te mea ka whakaaturia ki te tuaka pae, he aha hoki ka whakaaturia ki te tuaka pou?  (Ko ngā ingoa o ngā kaitākaro ki te tuaka pae, ko ā rātou oma ki te tuaka pou.)

    Ka tīmata ki te tuaka pou.  He aha te tau nui rawa hei whakaatu ki te tuaka pou?  (Ko te 113, koirā  ngā oma i riro i a Hera.)

    Kāore e taea te whakaatu ngā tau katoa mai i te 0 ki te 113 ki te tuaka pou, kāore e pērā rawa te nui o te whārangi.  He pai pea ki te whakaatu i ia tekau.  Tuhia he rārangi mō te tuaka pou.  Whakaaturia ngā tatau mawhiti-tekau mai i te 0 ki te 120 ki te tuaka pou.

    Tuhia he rārangi mō te tuaka pae.  Tīmata i te taha mauī o te tuaka pou, ka haere whakatematau.  Whakaaturia ngā kaitākaro ki te tuaka pae.  Tokoono ngā kaitākaro, nō reira whakaritea he wāhi mō ngā pou e ono.  Tuhia ngā ingoa o ngā kaitākaro ki raro i te wāhi kua whakaritea mō ia pou.

    Tuhia he pou mō ia kaitākaro.  Kia rite te teitei o te pou ki te maha o ngā oma i riro i ia kaitākaro.

    Ko te mea whakamutunga, he tapa i ngā tuaka, he tapa hoki i te kauwhata.

     

    Hoatu te whārangi mahi Kauwhata Pou 4 (PDF, 81KB) hei whakaoti mā ngā ākonga.  He pai pea te mahi takirua.

  5. Hei mahi whakamutunga mō tēnei kaupapa, tukuna mā ngā ākonga e whakahaere ā rātou ake tūhuratanga tauanga, me te whakaatu anō i ngā whakakitenga ki te kauwhata pou.  Kei te whārangi mahi Kauwhata Pou 5  (PDF, 98KB) ētahi whakaaro me ētahi tohutohu mō tēnei tūhuratanga.

 

Attachments

Printed from https://nzmaths.co.nz/resource/te-kauwhata-pou at 9:01am on the 29th March 2024